ग्यास अभाव हटाउन सरकारको नयाँ व्यवस्था, जुनसुकै ब्रान्डको सिलिन्डर साट्न पाइने

काठमाडौं । भोटेकोशीमा आएको विनाशकारी बाढीका कारण काठमाडौँ उपत्यकामा देखिएको खाना पकाउने ग्यास (एलपी ग्यास) को आपूर्ति समस्यालाई समाधान गर्न सरकारले नयाँ र आपतकालीन व्यवस्था लागू गरेको छ । उद्योग, वाणिज्य तथा आपूर्तिमन्त्री गौरीकुमारी यादवको निर्देशनअनुसार अब उपत्यकाभित्र एउटा कम्पनीको खाली सिलिन्डर दिएर अर्को कम्पनीको भरिएको सिलिन्डर सोही मूल्यमा साट्न पाइने भएको छ ।

आफूले प्रयोग गर्दै आएको ब्रान्ड बजारमा अभाव भएमा वा उपलब्ध नभएमा उपभोक्ताले अन्य ब्रान्डको सिलिन्डरमार्फत ग्यास खरिद गर्न सक्नेछन् । बाढीका कारण आपूर्ति चक्र बिग्रिएकाले उपभोक्तालाई तत्काल राहत दिन यो अस्थायी व्यवस्था गरिएको हो । मन्त्रीले यो निर्णयलाई तत्काल र कडाइका साथ कार्यान्वयन गर्न नेपाल आयल निगम तथा सम्पूर्ण ग्यास उद्योगहरूलाई कडा निर्देशन दिएकी हुन । 

साथै, संकटको मौका छोपेर कृत्रिम अभाव सिर्जना गर्ने, सिलिन्डर साट्न अस्वीकार गरी उपभोक्तालाई दुःख दिने वा तोकिएको नियम पालना नगर्ने जोकसैलाई पनि प्रचलित कानुनबमोजिम कडा कारबाही गरिने चेतावनीसमेत मन्त्रालयले दिएको छ।