बाढी पीडितको उद्धार र राहतका लागि एडिबीले ५० लाख डलर अनुदान दिने

काठमाडौं । एसियाली विकास बैंक ९एडीबी० ले रसुवाको भोटेकोशीको विनाशकारी बाढी पीडितको उद्धार तथा राहतका लागि ५० लाख अमेरिकी डलरको आपतकालीन अनुदान स्वीकृत गरेको छ । एडिबीले शुक्रबार जारी गरेको विज्ञप्तिअनुसार अनुदान रकम बाढी प्रभावित क्षेत्रमा खोज तथा उद्धार सामग्री, औषधि, खाद्यान्न, सुरक्षित खानेपानी, अस्थायी आश्रय, सरसफाइ सामग्री तथा आपत्कालीन पूर्वाधार व्यवस्थापनमा खर्च गरिनेछ ।

एडिबी अध्यक्ष मासातो कान्दाले विपद्का बेला प्रभावित नागरिकले सहयोगका लागि लामो समय पर्खन नसक्ने भएकाले तत्काल आवश्यक वस्तु तथा सेवा उपलब्ध गराउन अनुदान महत्वपूर्ण हुने बताएका छन् । उनका अनुसार बाढी प्रभावित परिवारलाई तत्काल खाद्यान्न, सुरक्षित खानेपानी, अस्थायी आश्रय र औषधि उपलब्ध गराउन अनुदान परिचालन गरिनेछ ।

एडिबीले नेपाल सरकार, राष्ट्रिय विपद् जोखिम न्यूनीकरण तथा व्यवस्थापन प्राधिकरण, संयुक्त राष्ट्रसंघीय निकाय तथा अन्य विकास साझेदारसँग समन्वय गरी उद्धार, राहत तथा पुनःस्थापनाका काममा सहयोग गरिरहेको जनाएको छ ।