क्यासिनोमा होटलको १० प्रतिशत सेयर स्वामित्व हुनैपर्ने बाध्यकारी व्यवस्था हटाउन हानको माग

काठमाडौं । होटल संघ नेपाल (हान) ले क्यासिनो सञ्चालन गर्ने तारे होटलमा होटलको १० प्रतिशत सेयर अनिवार्य हुनुपर्ने प्रस्तावित व्यवस्था हटाउन माग गरेको छ । 

बिहीबार सिंहदरबारमा बसेको प्रतिनिधि सभाको अन्तर्राष्ट्रिय सम्बन्ध र पर्यटन समितिको बैठकमा पर्यटन विधेयक, २०८१ माथिको छलफलमा बोल्दै हान अध्यक्ष विनायक शाहले यस्तो माग गरेका हुन् ।

शाहले चारतारे र पाँचतारे होटलमा क्यासिनो सञ्चालन गर्न पाउने व्यवस्था गरेपनि क्यासिनोमा सम्बन्धित होटलको १० प्रतिशत सेयर अनिवार्य गर्ने प्रावधान उचित नहुने तर्क गरे । उनले क्यासिनो सञ्चालनमा होटललाई अनिवार्य रूपमा साझेदार बनाउँदा क्यासिनो बन्द भएपछि त्यसबाट उत्पन्न हुने कानुनी तथा आर्थिक दायित्वसमेत होटलले व्यहोर्नुपर्ने अवस्था आउने उनको भनाइ छ । उनले होटल व्यवसायीहरुले आजपनि क्यासिनोसम्बन्धी मुद्दा मामिला झेलिरहेको गुनासो पनि गरे ।

उनले क्यासिनोमा होटलले लगानी गर्न चाहेमा मात्र सेयर लिन पाउने व्यवस्था गर्नुपर्ने बताए । शाहले प्रस्तावित विधेयकको दफा ४० मा क्यासिनोमा वैदेशिक संयुक्त लगानीलाई अनुमति दिने व्यवस्था गरिएको तर होटल व्यवसायको क्षेत्रललाई नगरिएकोप्रति गुनासो समेत गरे । उनले सरकारले क्यासिनोको आम्दानीबाट २ प्रतिशत अनिवार्य रुपमा संस्थागत सामाजिक उत्तरदायित्वमा लागनी गर्नुपर्ने व्यवस्था गरेको भन्दै होटललाई समेत सामाजिक उत्तरदायित्वमा केही प्रतिशत खर्च गर्न पाउनुपर्ने बताए । प्रस्तावित विधेयकले सगरमाथा आरोहण गर्न कम्तिमा सात हजार मिटरभन्दा अग्लो कुनै एउटा हिमालचुली आरोहण गरेकै हुनुपर्ने व्यवस्था समेत प्रस्ताव गरेको छ ।