प्रतिबन्धित मुलुक कुबेत जान लागेका २७ महिला एयरपोर्टबाट प्रहरी नियन्त्रणमा, विदेश पठाउने गिरोहको खोजी

काठमाडौं । भिजिट भिसामार्फत खाडी मुलुकतर्फ जान लागेका २७ महिलालाई प्रहरी नियन्त्रणमा लिइएको छ । बुधवार राति फ्लाई दुबईको फरक फरक उडान हुँदै ओमनको राजधानी मस्कटतर्फ जान लागेका १२ र १५ गरी दुई समूहका २७ जनालाई त्रिभुवन अन्तर्राष्ट्रिय विमानस्थलबाट नियन्त्रणमा लिइएको हो । 

काठमाडौं उपत्यका अपराध अनुसन्धान कार्यालयले २२ देखि २९ वर्ष उमेरसम्मका २७ महिला ‘भिजिट भिसा’ अर्थात् पर्यटकका रूपमा विदेश जान लागेको सुईंको पाएपछि नियन्त्रणमा लिएको बताईएको छ । ओमन जान उडेका भएपनि ति महिलाहरु रोजगार प्रतिविन्धित मुलुक कुबेत जान लागेको पाइएको छ । पक्राउ गरिएका महिलाहरुसँग ओमनको भिसा, टिकट र होटल डकुमेण्ट देखिए पनि सोही पासपोर्टमा कुवेतको भिसा पनि भेटिएपछि विमानस्थल अध्यागमनले शंकाका आधारमा निगरानी गरेको थियो । अध्यागमनले शंका गरेपछि प्रहरीले गरेको अनुसन्धानमा महिलाका निम्ति वैदेशिक रोजगारी प्रतिबन्धित मुलुक कुवेतको भिसा देखिएकाले विदेश पठाउने गिरोहको खोजी गर्न उनीहरुलाई प्रहरीले नियन्त्रणमा लिएको हो ।

फ्लाई दुबईको उडानबाट ओमनको राजधानी मस्कट हुँदै कुवेत जाने रुट तय भएको बताइएको छ । कुवेतमा घरेलु कामदारका रूपमा स्थानीय एजेण्टले नेपाली महिलाको अनुहार हेर्दै छानेर लैजाने र कुनै घरमा कामदारका रूपमा राख्ने प्रचलन बढ्दो छ । अवैध माध्यमबाट कुबेत गएका महिला शारीरिक यातना देखि यौनजन्य हिंसामा पर्ने गरेको पाईन्छ ।