ट्रम्प सहभागी कार्यक्रममा गोली चलाउने व्यक्ति को हुन् ?

काठमाडौं । अमेरिकी राष्ट्रपति डोनाल्ड ट्रम्प सहभागी ह्वाइट हाउस संवाददाता संघको रात्रिभोज कार्यक्रममा गोली चलाउने व्यक्ति दक्षिण क्यालिफोर्नियाका शिक्षक तथा भिडियो खेल निर्माता रहेको खुलेको छ । गोली चलाउने व्यक्ति ३१ वर्षीय कोल टोमस एलेन भएको सिएनएनले उल्लेख गरेको हो । राष्ट्रपति ट्रम्पसहित उच्च अधिकारीहरू सहभागी भएको कार्यक्रममा उनलाई हतियारसहित नियन्त्रणमा लिइएको छ । उनी लस एन्जलस नजिकैको टोरेन्स क्षेत्रमा बसोबास गर्दै आएका थिए । सार्वजनिक अभिलेखअनुसार एलेन परीक्ष तयारी तथा ट्युसन सेवा दिने एक संस्थामा अंशकालीन शिक्षकका रूपमा काम गर्थे । उनलाई सन् २०२४ डिसेम्बरमा कम्पनीले ‘महिनाको उत्कृष्ट शिक्षक’ समेत घोषणा गरेको थियो । उनले सन् २०१७ मा क्यालिफोर्निया प्रविधि संस्थानबाट यान्त्रिक इन्जिनियरिङमा स्नातक गरेका थिए । त्यसपछि गत वर्ष क्यालिफोर्निया राज्य विश्वविद्यालय(डोमिङ्गेज हिल्सबाट कम्प्युटर विज्ञानमा स्नातकोत्तर पूरा गरेका थिए । विद्यार्थी जीवनमा उनले ह्विलचेयरका लागि आपत्कालीन ब्रेकको नमुना तयार गरेका थिए, जसका कारण स्थानीय समाचारमा पनि स्थान पाएका थिए । एलेनले आफूलाई भिडियो खेल निर्माता पनि बताएका छन् ।

अधिकारीहरूका अनुसार, एलेनसँग एकभन्दा बढी घातक हतियारहरू थिए । उनले सटगन, ह्यान्डगन तथा कैयौँ चक्कु बोकेका थिए र मुख्य ‘म्याग्नेटोमिटर’ (धातु पहिचान गर्ने उपकरण) नजिकै सुरक्षकर्मीमाथि गोली प्रहार गरेका थिए । प्रहरीले यस घटनालाई एकल आक्रमणका रूपमा अनुसन्धान गरिरहेको छ । संदिग्धको कोठाबाट प्राप्त हुने प्रमाणहरूले उनको उद्देश्य र सम्भावित ठूलो षड्यन्त्रसँग सम्बन्ध थियो कि थिएन भन्ने कुरा स्पष्ट पार्ने जनाइएको छ ।

हाल उनलाई नियन्त्रणमा लिएर स्वास्थ्य परीक्षणका लागि अस्पतालमा राखिएको छ ।