नेपाल उद्योग वाणिज्य महासंघ निर्वाचन प्रक्रिया तत्कालका लागि रोकियो

काठमाडौं । नेपाल उद्योग वाणिज्य महासंघको ६० औँ साधारणसभा र निर्वाचन प्रक्रिया तत्कालका लागि रोकिने भएको छ । उच्च अदालत पाटनका न्यायाधीशद्वय खड्कबहादुर केसी र दीपक खनालको संयुक्त इजलासले बिहीबार रिट निवेदकको माग बमोजिम अन्तरिम आदेश जारी गरेपछि महासंघको चुनावी तत्कालका लागि रोकिने भएको हो ।

नेपाल पेट्रोलियम ढुवानी व्यवसायी महासंघले दायर गरेको रिटमा उच्च अदालत पाटनले अन्तरिम आदेश दिएसँगै तत्कालका लागि महासंघको निर्वाचन रोकिएको हो।

बिहीबार उच्च अदालतका न्यायाधीश खड्कबहादुर केसी र दीपक खनालको संयुक्त इजलासले निवेदकहरुको माग पूर्ण रुपमा सम्बोधन नभई संस्थाको साधारण सभाहुँदा असर पर्ने भएकोले सोको निर्णय नभएसम्म महासंघको साधारणसभा नगर्नु र नगराउन अन्तरिम आदेश जारी गरेको हो।

ढुवानी व्यवसायी महासंघले २०८१ चैत २८ मा सम्पन्न एफएनसीसीआईको ५९औं वार्षिक साधारण सभामा सदस्यको हैसियतले उपस्थित रहेकामा अहिले आफूलाई समावेश नै नगरी एवं सदस्यता सम्बन्धी निर्णय नगरी साधारण सभा गर्न लागिएको भन्दै अन्तरिम आदेश मागेर रिट दायर गरेको थियो ।