नेपालमा पश्चिमी वायु र स्थानीय वायुको दोहोरो प्रभाव, पहाडी तथा हिमाली भेगमा वर्षा र हिमपातको सम्भावना

काठमाडौं । नेपालमा हाल पश्चिमी न्यून चापीय प्रणाली र स्थानीय वायुको सक्रिय प्रभाव देखिएको छ। यस मौसमी प्रणालीका कारण गण्डकी, कर्णाली र सुदूरपश्चिम प्रदेशलगायत देशका पहाडी तथा हिमाली क्षेत्रहरूमा सामान्य देखि पूर्ण बदलीको अवस्था रहेको जल तथा मौसम विज्ञान विभागले उल्लेख गरेको छ भने अन्य क्षेत्रमा आंशिक बदलीको स्थिति छ।

आज चैत २४ गते दिउँसोको मौसम पूर्वानुमान अनुसार, देशभरका पहाडी र हिमाली भू–भागमा सामान्य बदली रहने तथा बाँकी क्षेत्रमा आंशिक बदली हुने देखिन्छ। यस क्रममा पहाडी तथा हिमाली भेगका केही स्थानहरू र कोसी प्रदेशको तराई क्षेत्रका थोरै स्थानमा मेघगर्जन र चट्याङसहित मध्यम वर्षा र हिमपातको सम्भावना रहेको विभागको भनाइ छ।

रात्रिकालीन समयमा पनि गण्डकी, लुम्बिनी, कर्णाली र सुदूरपश्चिम प्रदेशसहित वाग्मती र कोसी प्रदेशका हिमाली भेगमा मौसम सामान्यतया बदली रहनेछ। लुम्बिनी, कर्णाली र सुदूरपश्चिम प्रदेशका थोरै स्थानहरूका साथै गण्डकी, वाग्मती र कोसी प्रदेशका पहाडी तथा हिमाली भू–भागमा मेघगर्जन र चट्याङसहित वर्षा र हिमपात हुन सक्ने पूर्वाभास गरिएको छ। तसर्थ, सम्बन्धित क्षेत्रका बासिन्दाहरूलाई मौसमको यो अवस्थालाई मध्यनजर गर्दै आवश्यक सतर्कता अपनाउन विभागले सूचित गरेको छ।