वैदेशिक रोजगारीमा जाने कामदारले अब सबै सरकारी अस्पतालबाट स्वास्थ्य परीक्षण गर्न पाउने

काठमाडौं । वैदेशिक रोजगारीमा जाने कामदारले अब आफ्नो स्वास्थ्य परीक्षण सबै अस्पतालबाट पनि गर्न पाउने भएका छन् । नवनियुक्त श्रम, रोजगार तथा सामाजिक सुरक्षा मन्त्री दीपककुमार साहले स्वास्थ्य क्षेत्रको सिन्डिकेट तोड्दै अस्पतालबाट पनि स्वास्थ्य परीक्षण गराउने बाटो खुला गरिदिएका हुन् ।

आज बिहानै श्रम मन्त्री शाहले वैदेशिक रोजगारीमा जाने कामदारका हकमा स्वास्थ्य परीक्षण समितिबाट मात्र नभई अस्पतालबाट पनि गर्ने निर्णय गरिएको बताए । उनले वैदेशिक रोजगारीमा जाने कामदारका लागि अस्पतालबाट पनि स्वास्थ्य परीक्षण गर्न सक्ने व्यवस्था गरिएको जानकारी दिए । मन्त्रालयले जारी गरेको प्रेस विज्ञप्तिअनुसार वैदेशिक रोजगारी ऐन, २०६४ र नियमावली, २०६४ मा भएको व्यवस्थाअनुसार श्रमिकले विदेश जानुअघि स्वीकृत स्वास्थ्य संस्थाबाट परीक्षण गराउनुपर्ने प्रावधान छ। तर, व्यवहारमा सीमित संस्थामार्फत मात्रै सेवा दिएपछि सिन्डिकेटको आरोप लाग्दै आएको थियो ।

श्रम तथा रोजगार मन्त्रालयले जारी गरेको मापदण्डअनुसार हाल १९४ वटा स्वास्थ्य संस्था नवीकरण भएका छन् । यिनै संस्थामार्फत वैदेशिक रोजगारीमा जाने श्रमिकको स्वास्थ्य परीक्षण हुँदै आएको थियो । अब आगामी दिनमा सबै अस्पतालबाट स्वास्थ्य परीक्षण गर्न मिल्ने भएको छ । यसअघि वैदेशिक रोजगारीमा जाने श्रमिकको स्वास्थ परीक्षणका लागि ६ हजार ६ सय रूपैयाँ शुल्क लिएर निश्चित नीजि स्वास्थ संस्थाले परीक्षण गराउँदै आएका थिए ।