इरानमा प्रहरी हत्या आरोपमा तीन जनालाई मृत्युदण्ड

काठमाडौँ । इरानमा प्रहरी हत्या आरोपमा तीन जनालाई मृत्युदण्ड दिइएको छ । अन्तर्राष्ट्रिय सञ्चारमाध्यम अल जजीराले इरानी सञ्चारमाध्यमलाई उद्धृत गर्दै जनाएअनुसार ती तीन जनालाई जनवरी महिनामा भएका सरकारविरोधी प्रदर्शनका क्रममा दुई प्रहरी अधिकारीको हत्या गरेको आरोपमा दोषी ठहर गर्दै मृत्युदण्ड दिइएको हो ।

यस वर्षको सुरुवातमा इरानभर ठूला प्रदर्शन भएका थिए, जसमा व्यापक हिंसा भएको थियो । विभिन्न सञ्चारमाध्यमका अनुसार ती प्रदर्शनका क्रममा करिब ३ हजार ११७ जनाको मृत्यु भएको बताइएको छ ।

तर ह्युमन राइट्स एक्टिभिस्ट्स न्यूज एजेन्सीका अनुसार वास्तविक संख्या अझ बढी हुन सक्ने उल्लेख गरिएको छ । उक्त संस्थाले अहिलेसम्म ६ हजार ८५४ जनाको मृत्यु पुष्टि भएको र ११ हजारभन्दा बढी घटनाको अनुसन्धान अझै जारी रहेको जनाएको छ ।