प्रत्येक निर्वाचन क्षेत्रको छुट्टाछुट्टै मतगणना सम्वन्धित क्षेत्रमै हुने, प्रत्यक्षको सकिएपछि समानुपातिक

काठमाडौं । प्रतिनिधिसभा सदस्य निर्वाचनको मतगणना १६५ निर्वाचन क्षेत्रअन्तर्गत निर्वाचन अधिकृतको कार्यालयमा हुने भएको छ ।

निर्वाचन आयोगका अनुसार पहिलो निर्वाचित हुने (प्रत्यक्ष) प्रणालीतर्फको मतगणना सम्बन्धित निर्वाचन क्षेत्र मातहतका मतदानस्थलबाट मतपेटिका निर्वाचन अधिकृतको कार्यालयमा संकलन भईसकेपछि सुरु गरिने भएको हो । मतगणना सुरु हुनुअघि जिल्ला तथा निर्वाचन क्षेत्रस्थित मतगणनामा स्थलमा सर्वदलीय बैठक बस्ने छ । आयोगले प्रत्यक्षतर्फको मतपरिणाम गणना सुरु भएको २४ घण्टाभित्र सार्वजनिक गर्ने योजना बनाएको छ । प्रत्यक्षतर्फको मतपरिणाम सार्वजनिक भएपछि समानुपातिकतर्फको मतगणना सुरु गरिने आयोगको भनाई छ ।

आयोगकाअनुसार काठमाडौंका उपत्यकाका सबै निर्वाचन क्षेत्रमा सकेसम्म आजै मतगणना थालिने छ । उपत्यकामा आज सम्पन्न प्रतिनिधिसभा सदस्य निर्वाचनमा ६० देखि ६५ प्रतिशत मत खसेको प्रारम्भिक अनुमान छ । यद्यपी खसेको मतको यकीन विवरण आउन केही समय लाग्ने बताइएको छ ।